Memoria de Redondela–A. (Álbum de postais)

Descripción

Este libro de estampas non pretende ser máis ca iso, a captura da vida doutros anos, recordo que fai que en nós agrome de novo a idea dunha Redondela recuperada. Son as postais, é dicir, a imaxe con que a nosa vila se presentaba diante do mundo enteiro, a cara fermosa para amosarlles ós de fóra que existiamos, como eramos e como viviamos: preto do mar e do campo, nun verde val rodeado de montes e costas, un fondo circo redondo atravesado por dúas vías do tren, lanzadas por riba das casas gracias á modernidade da enxeñería do ferro, que trazaba pontes. Pertencen estas postais á colección de Luís Borines, un redondelán que tamén perdeu a súa Redondela, e que dende hai anos trata de reconquistala nun arquivo de postais que andan espalladas polo mundo adiante, en tendas inverosímiles, en chambos e rastros, en centros de coleccionismo por toda Europa.