Contos do Oeste

Descripción

O Oeste norteamericano, as rexións inmensas que o home branco foi colonizando ó longo do século pasado, é seguramente a rexión mítica por excelencia para o público actual. Coñecémola polo cine, por innumerables películas ambientadas naquela época dos pioneiros, por historias que falan de homes libres nun territorio salvaxe. A épica retratada nos westerns de Hollywood tivo os seus precedentes literarios (tamén fotográficos e pictóricos), sen dúbida menos coñecidos, pero tanto ou máis interesantes, xa que falaban en directo do que estaba pasando na fronteira. O presente volume acolle algúns bos exemplos da literatura do Oeste. Danse cita nestas páxinas historias entre a épica e a traxedia, como as de Nathaniel Hawthorne, Stephen Crane ou Ambrose Bierce, pero tamén aqueloutras nas que o humor se fai dono das chairas infinitas e das enormes montañas polas que andaron mestres do relato como Francis Bret Harte, Mark Twain e O Henry.