(5)Terra de Santiago

Descripción

Este volume quinto de Galicia Enteira vai dedicado á cidade de Santiago que é o ser de Galicia e constitúe o celme de calquera guía turística galega. Abrangue ademais a chamada Terra de Santiago, que percorreremos en forma radial coas viaxes indicadas.
Cada unha destas viaxes inclúe pequenos desvíos ou percorridos secundarios que indicaremos no seu sitio.

A Cidade de Santiago de Compostela, ademais de ser un centro internacional histórico de atracción espiritual, cultural e turística, é tamén o centro natural da comarca que leva o seu nome. En calquera división xeográfica de Galicia, unha das comarcas máis características é a Terra de Santiago, que reborda algo os límites que, por razóns de tipo práctico, lle marcamos neste volume de Galicia Enteira 5.  A comarca natural de Santiago espallaríase cara ó Leste ata os lindes da provincia de Lugo pola Cova da Serpe. Cara ó Sur baixaría ata a Terra de Tabeirós e incluiría pola costa a Península do Barbanza e a ría de Muros e Noia.
Esta comarca da Terra de Santiago caracterízase por un equilibrio nas estatísticas de poboación, xa que acada os valores medios galegos, próximos ós cen habitantes por km², coa poboación uniformemente distribuída.